Relief goods gipang-apod sa nasunogan

CEBU, Philippines - Gipaubos sa konseho sa barangay Paknaan sa dakbayan sa Mandaue sa state of calamity ang sitio lower Camansi nga naigo sa sunog niadtong miaging adlaw nga miugdaw sa panimalay sa mokabat 258 ka mga pamilya.

Ang desisyon nakab-ot human sa sesyon sa barangay pinangulohan ni barangay kapitan Malaquias Soco ug ang rekomendasyon iduso ngadto sa city disaster and coordinating council ug ngadto sa Konseho sa dakbayan.

Si Roger Paller nga maoy information officer sa maong dakbayan miingon nga ang buhatan sa City Social Welfare Office sa Mandaue nga gipangulohan ni Violita Cabada nakahatag na og hinabang sa 234 ka tag-iya og panimalay ug 34 ka mga nag-abang gikan sa calamity fund sa dakbayan.

Matud pa niya nga ang tag-iya og balay makadawat og P10,000 nga kantidad ug P5,000 sa mga nag-abang.

Si Gobernador Gwendolyn Garcia ug Cebu 3rd District Congressman Pablo John Garcia mibisita kagahapon sa mga nasunogan inubanan ni 6th District Board Member Thadeo Ouano ug Mandaue City Councilor Lollipop Ouano Dizon ug nanghatag og hinabang.  (BANAT NEWS)