Pasaheroan pisat sa lubi

CEBU, Philippines - Upat ka mga pasahero ug drayber ang naangol sa jeep pasaheroan human aksidenteng natumbahan sa punoan sa lubi sa national highway sa barangay Jubay sa lungsod sa Liloan niadtong Miyerkules sa ala 1:00 sa hapon.

Ang multicab nga pasaheroan gimaneho ni Wilfredo Pepito Marolina, 48, kinsa lakip sa naangol uban sa iyang mga pasaherong sila si Mirabelle Andales,19; Malou Villamor, 31; Archie Tajanlangit, 32; ug Fe Pastoran,54.

Subay sa imbestigasyon ni SPO1 Claudio Castro ang traffic investigator sa Liloan Police Station paingon ang mga biktima sa siyudad sa Sugbo dihang natumbahan sa maong punoan sa lubi. Ang mga molupyo sa maong lugar mao nay nagtinabangay pagtangtang sa punoan sa lubi nga nitabon sa multicab ug gidali paghatud sa Vicente Sotto Memorial Medical Center (VSMMC) ang mga naangol.

Tungod sa hitabo nabalda og kapin usa ka oras ang dagan sa trapiko sa maong lugar hinuon dihang nakuha ang punoan nakalusot na ang mga motorista. Nasuta sa kapolisan nga gabok na ang punoan niini maong natumba. (BANAT NEWS)