CEBU, Philippines - Human gihulipan si Engr. Josefa Ylanan isip head sa Office of the Building Official sa miaging semana, gipahibalo ni Mayor Michael Rama nga duna pa’y laing tulo ka mga department heads ang iyang hinabion ug ibalhin na usab sa laing departamento.
Giklaro sa mayor nga kabahin lang kini sa gihimo niya nga re-organization sukad milingkod siya isip mayor niadtong 2012 busa dili na kini angayan nga ikahibulong.
Nagkanayon si Rama nga normal lang kini sa usa ka local government unit nga dunay mga hulipan aron mapalapad ang serbisyo niini sa katawhan.
Nasayran nga ang head sa Department of Engineering and Public Works (DEPW) nga si Engr. Kenneth Carmelita Enriquez maoy temporaryong modumala sa OBO samtang si Ylanan gihimong assistant head sa DEPW.
Kahinumduman usab nga ang head kaniadto sa Department of Social Welfare and Services nga si Cathy Yso gibalhin sa Department of Public Services ug gibutang na usab karon sa Cebu City Disaster Risk Reduction Management Council.
Una na nga gipadayag ni Rama nga walay kalabotan sa politika ang iyang gibuhat ug parte lang kini sa naandan nga re-organization sa iyang administrasyon.
(BANAT NEWS)