Dul-ang 200 ka balay ugdaw

CEBU, Philippines - Mikabat sa dul-ang 200 ka balay ang naugdaw sa sunog nga miigo sa sitio Lower Zone Camansi, barangay Paknaan, dakbayan sa Mandaue kagahapon sa alas 8:16 sa buntag.

Samtang mikabat usab sa P250 mil ang gibana-banang kadaot sa maong sunog.

Si Mandaue City Fire Marshall Rogelio Bongabong mipaubos sa Task Force Alpha sa maong sunog nga nakontrol nila sulod sa 28 minutos.

Si FO3 Nilo Cosedo nga maoy imbestigador sa kabomberohan sa maong dakbayan miingon nga nagsugod ang kayo sa balay ni Rodenecio Ramos ug dali kining mikatap sa iyang mga silingan  ug mikabat sa 193 ang tanang balay nga naugdaw.

Matud pa ni FO3 Cosedo nga dugang pang pakisusi ang ilang himoon pagsuta sa hinungdan sa maong sunog.

Hinuon walay mga kinabuhing naangin sa maong katalagman sumala ni FO3 Cosedo.

Gipaabot sa kagamhanan sa maong dakbayan nga ikapaubos sa state of calamity ang maong lugar aron si Mayor Jonas Cortes sa maong dakbayan makahatag   dayon og hinabang sa mga biktima niini.

Hinuon ang buhatan sa City Social Welfare Office nga gipangulohan ni Violita Cabada mimando dayon   sa paghatag og mga pagkaon sa mga biktima nga pamilya sa maong sunog. (BANAT NEWS)