Libreng tambal sa HIV carriers gihatag

CEBU, Philippines - Nakadawat na bag-ohay lang og libreng Anti Retroviral Treatment (ART) gikan sa goberno ang 48 ka mga nataptan og Human Immuno Virus (HIV) nga maghatag og agianan paingon ngadto sa Acute Immunity Deficiency Syndrome (AIDS) dinhi sa Central Visayas .

Matud pa ni Department of Health (DOH) 7 Regional Director Asuncion Anden nga ang maong treatment ma-avail sa Vicente Sotto Memorial Medical Center (VSMMC) kung diin ang mga pasyente hatagan og duha ka tabletas matag adlaw nga nagkantidad og P1,500 hangtod P3000 sa usa ka bulan.

Gikan sa tuig 1984 hangtod 2012, anaay 488 ka mga indibidwal nga nasuta nga nataptan og HIV sa Central Visayas apan 48 ka pasyente lamang ang nakadawat og Anti-Retroviral Treatment.

Base sa standards sa World Health Organization (WHO), ang mga nataptan og HIV kinahanglan nga mo-avail sa ART kung ang iyang CD4 count kung diin usa kini ka sukod sa gikusgon sa immune system moubos ngadto sa 300 cells/mm3.

Sumala pa sa DOH nga ang mga nataptan og HIV kinahanglang relihiyoso nga mobisita sa treatment facilities matag unom ka bulan aron mamonitor sila pag-ayo.

Base sa DOH’s Philippines HIV and AIDS Registry, adunay 212 ka bag-ong kaso sa HIV lakip na ang upat ka kaso sa AIDS nga natala sa Enero ning tuiga kung diin ang usa sa upat ka kaso mao ang usa ka lalaki nga nagpanuigon og pito ka tuig nga natakboyan sa maong virus samtang anaa pa siya sa sabakan sa iyang inahan hinungdan nga siya namatay.

Sa 8,576 ka natalang kaso tibuok nasud gikan sa tuig 1984 hangtod karong tuig 2012, anaay dili mominus 342 na ang namatay.

Kinatibuk-ang 7,854 ang nataptan pinaagi sa sekswal nga kontak samtang ang 268 pinaagi sa pagpakigsaw og dagom sa mga tiggamitan og drugas nga mag-inject lang ug ang pagkatakboy pinaagi sa mother-child transmission nakatala og 56 ka kaso samtang adunay 20 ka kaso usab ang pinaagi sa blood transfusion. (BANAT NEWS)