CEBU, Philippines - Mikabat sa 250 ka mga bata nga naggikan sa kabus nga pamilya sa lungsod sa San Fernando ang nakapahimulos sa gipahigayong “Operation Tuli” nga gipasiugdahan ni Gerald Anthony “Samsam” Gullas ,apo ni Kongresista Eduardo Gullas sa unang distrito sa probinsiya sa Sugbo niadtong Martes.
Si Samsam maoy First Congressional District Consultant on Children and Youth Affairs ug nahimo niyang kaabag sa maong proyekto si kanhi Mayor Lakambini “Neneth” Reluya.
“Bisag wa ta sa serbisyo, kada tuig gyud ta mohatag og free tuli sa mga bata. Hopefully, makatabang na nila. And while waiting, ang mga ginikanan pwede sab maka-avail og free eye checkup and the free eyeglasses through Mabuhay Foundation Inc.”, ni Reluya pa.
Ang kapitan sa barangay Panadtaran nga si Nonoy Reluya, bana sa kanhi mayor ug ang mga opisyal sa maong barangay mitabang usab sa maong kalihokan.
Si Samsam pinaagi sa Priority Development Assistance Fund sa iyang apohan mihatag usab og libreng mga bitamina ug tambal ngadto sa mga bata.
Ang mga sakop sa 78th Infantry Brigade (IB), mga sakop sa Talisay City Health Office nga gipangulohan ni Dr. Lino Alanzado, Perpetual Soccor Hospital nga gipangulohan ni Dr. Accel Scalit ug ang mga barangay health worker sa Panadtaran mitabang usab sa maong kalihokan.
Ang grupo ni Samsam gitakdang mobisita usab sa dakbayan sa Carcar ug Naga ug sa lungsod sa Minglanilla aron mopahigayon usab og Operation Tuli. (BANAT NEWS)