11-anyos gitahan sa papa

CEBU, Philippines - Gitahan sa amahan ang iyang 11-anyos nga anak nga aksidenteng nakapusil sa 13-anyos nga higala kagahapon diha sa Cebu City Hall sa wala pa kini gi-turnover ngadto sa buhatan sa   Department of Social Welfare and Development (DSWD).

Si Senior Inspector Jul Mohammad Jamiri, hepe sa Homicide Section sa Cebu City Police Office (CCPO) mitug-an nga ang amahan sa 11-anyos direktang midala sa anak ngadto sa Cebu City Hall. Ang mga imbestigador sa Homicide Section nagkanayon nga gipahibawo nalang sila aron moabag sa suspek paingon ngadto sa buhatan sa DSWD.

Matud ni Jamiri ilang pakigkitaan ang bata aron ilang pangutan-on kun diin gikan ang armas nga gigamit niini sa pagpusil sa 13-anyos nga biktima niadtong Sabado sa hapon diha sa barangay Pasil.

Sa laing bahin ang biktima anaa gihapon sa kritikal nga kahimtang diha sa Cebu City Medical Center (CCMC).      

Ang mga ginikanan sa bata mipasabot nga wala nila tagoi ang bata ug ilaha lang kining gidala sa Leyte alang sa seguridad niini.  

Samtang si Mayor Michael Rama miingon nga tabangan ang biktima pinaagi sa City Hospitalization Assistance and Medicines Program (CHAMP). Si Marivic Alolod ug karon nagtrabaho sa Department of Social Welfare and Services (DSWS) nga maoy miuban sa pagtahan sa bata miingon nga na-traumatized ang naulahi sa hitabo.