Polis midagan atol sa drug test

CEBU, Philippines - Mikaratil og dagan ang usa ka polis dihang nahibaw-an niining ang pagpatawag kanila usa diay ka surprise drug test diha sa ilang police station niadtong Mayo 15.

Ang polis nga giingong midagan mao si SPO1 Winston Alburo Isnani, atol sa gihimong random drug test sa Bogo City Police Station nga gipasiugdahan sa Deputy for Provincial Director for Administration pinangulohan ni Supt. Renato Malazarte ug sa PNP-Crime Laboratory.

Matud pa ni Malazarte sa mga tigbalita nga dihang iyaha nang gipalinya ang mga polis nabantayan niyang kalit lang nga milakaw si Isnani ug wala gyud manumbaling dihang ilang gitawag. Tungod niini, girekomendar ni Malazarte nga marelibo si Isnani ug ibutang sa headquarter sa CPPO samtang imbestigahon sa Provincial Investigation and Detective Management Branch (PIDMB).

“Kung mapamatud-ang tinuod ang rason (nigamit og illegal drugs) kun nganong siya midagan ma-dismiss siya sa iyang trabaho,” pasabot pa ni Malazarte. Samtang sa pakighinabi sa Banat News kang Isnani kini kusganong mihimakak sa pagduda ug alegasyong midagan siya atol sa drug testing ug iyang giklaro nga aduna lang siyay giadto.

“It so happen nga naa koy gilakaw, nataymingan lang nga pag-abot nila mao puy paglakaw nako. Wala man ko midagan,” pasabot pa ni Isnani.

Matud pa ni Isnani nga human na siyang miesplikar kalabot sa hitabo ngadto ni CPPO Provincial Director Sr. Supt. Patrocinio Comendador.

“Nag-wait lang ko sa ilang recommendation, kun unsa man ang ilang ika recommend, its up to him (Comendador) lang jud kay siya man akong gisulti-an,” matud pa ni Isnani.

Ang random drug testing gihimo sa tanang kapolisan sa habagatang bahin ug amihanang bahin sa lalawigan sa Sugbo isip pamaagi aron malimpyohan ang kapolisan sa tiggamitan og ginadiling drugas.

Si Malazarte mibutyag usab nga atol sa drug testing sa amihanang Sugbu adunay usa ka polis ang nagpositibo sa ilegal nga drugas samtang negatibo usab sa drug test ang kapolisan sa Moalboal, Alcantara, Barili ug Dumanjug.  - Jessica Handumon, CNU Intern ug Lesley Caminade-Vestil/EIM (BANAT NEWS)