Laing biktima sa salvage

CEBU, Philippines - Usa ka wala mailhing lalaking gigapos ug giputos og plastik ang ulo ug may mga samad pinusilan sa ulo ang nakit-an sa sitio Banggaan, barangay Cuanos lungsod sa Minglanilla niadtong Domingo, sa samang adlaw usab madiskubrehi ang usa pa ka lalaki nga gituohang biktima gihapon sa ‘summary execution’ diha sa lungsod sa Consolacion.

Ang biktima sa Minglanilla nagsul-ob og puti nga t-shirt ug maong nga shorts, mga 5’4” ang gitas-on ug gibanabanang nagpangidaron og 20 pataas ug adunay abstract tattoo sa walang abaga.

Usa ka Rolando Oberes, 35, nga residente sa maong dapit maoy nakakaplag sa biktima ug mipahibalo dayon sa kapolisan.

Ang biktima nagbuy-od na sa yuta nga giputos og plastik ang ulo, gigapos ang mga kamot og pisi ug adunay nakit-ang sako pipila ka metros gikan sa lawas niini.

Matud sa impormante nga si Oberes, pasado alas-11 sa buntag sa maong adlaw, nakadungog siya og upat ka buto. Ang patay’ng lawas sa biktima atoa na sa Saint Bernard Funeral Services aron ilhon sa mga kabanay. Kahinumduman nga adunay lalaki usab nga napalgang gibinaklid og gapos ug gituohang biktima sa ‘summary execution’ ug nabulit og samad pinusilan sa usa ka bakanteng luna sa sitio Laray sa barangay Nangka lungsod sa Consolacion niadtong Domingo sa gabii. Ang maong lalaki wala pa gihapon mailhi sa kapolisan samtang nagpadayon pa ang imbestigasyon sa maong duha ka kaso sa pagpang-salvage.  Danna Faye Enanoza, Jessica Handumon ug Darcy Immaculate Fortuna, CNU Interns (BANAT NEWS)