Nangompra'g kape gipatay

CEBU, Philippines - Usa ka mag-uuma nga nangompra og kape sa bukirang lugar sa San Fernando napalgang patay didto sa barangay Bughu, sa maong  lungsod kagahapon sa kaadlawon.

Ang biktima mao si Marcos Sibial Genon, 44 , minyo, usa ka mag-uuma, nga taga sitio Sambulawan, barangay Bugho, sa maong lungsod.

Si PO1 Miguel Bernabe sa San Fernando Police Station mibutyag sa Banat News nga ang biktima nakainom og alak ug paingon na kini sa ilang balay dihang paghitungod niini sa balay ni barangay Kagawad Heracleo Pacquiao kalit lang gipusil sa wala hiilhing kriminal niadtong Lunes sa gabii.

Si Pacquiao dihang giimbistigar sa kapolisan miangkon nga nakadungog sila sa butobuto sa armas niadtong Lunes sa gabii apan wala lang sila mogawas sa ilang balay tungod sa kangitngit sa palibot.

Apan kagahapon sa alas 4:00 sa kaadlawon si Nelson Tuason , hingkod, ug drayber sa habal-habal maoy nakadiskobri sa biktima nga nagbuy-od sa dalan nga patay na ug nagkadugo ang lawas.

Dali niya kining gireport kang kapitan Pedro Sebial sa maong barangay kinsa mao usab ang   mipahibawo sa kapolisan.

Nasuta sa kapolisan nga ang biktima samdan sa bukobuko ug ubang bahin sa lawas nga maoy nakaingon sa hinanali niining kamatayon.

Nagpabilin pang blangko ang kapolisan sa nagpatay sa biktima samtang gisusi pa nila ang mga anggulo nga gisukaran sa maong krimen. BANAT NEWS