Dalagitang amang gilugos sa silingan

CEBU, Philippines - Usa ka dalagita  nga amang  gilugos sa  ilang silingan sa usa  sa  mga bukirang barangay ning dakbayan sa Sugbo  ug nasayran  sa mga  ginikanan  dihang  pito  na  ka  buwan  ang  gisabak niini hangtud  nga kini  nanganak.

Dihang  gisukit  mitug-an  kini  pinaagi  sa sinyas nga didto  siya  pahimusli  sa silingan  nilang  mag-uuma   sa  payag niini  nga  nahimutang  sa kilid  sa kalasangan dili kaayo  layo  sa ilang balay.

Matud pa  sa amahan  nga  dihang  nasayran  sa suspek  nga nailhan siya nga maoy milugos  sa  biktima, milayas  kini  niadtong  Lunes.

Midugang ang  amahan nga niadtong miaging bulan ilang gipa check –up ang iyang anak didto  sa Vicente  Sotto Memorial Medical Center ug didto  niya  masayri nga  nagsabak  kini  og  pito  ka  buwan.

Sa mao  usab  nga  tambalanan nanganak  gyud  ang  biktima apan  namatay ang bata, sumala  sa amahan.

Giangkon sa amahan nga kaila ra kaayo niya ang suspek  ug  ania  ra  sa Sugbo magtago-tago  sa pagkakaron.

Kini ilang  nasayran dihang  si Janice Aparri usa usab ka bungol  ug  amang,  maoy misukit-sukit  pinaagi  sa sinyas  ngadto  sa biktima.

Ang  biktima  mitug-an  usab  pinaagi  sa sinyas  nga  sa  wala  pa  siya  lugosa, naglakaw niadtong higayona sa dalan, dihang kalit lang siyang gitionan og armas sa suspetsado.

Gidala kuno  siya sa payag sa  suspek ug  didto gisikad-sikaran  siya  niini unya gipahigda  sa salog, gigapos ang duha ka mga kamot, dayon  gihuboan siya  ug  gipahimuslan  ang  iyang  pagkababaye.

Dugang gibutyag  sa biktima  ngadto kang Aparri  nga human siya lugosa sa suspek gibiyaan siya niini busa   mipauli siya sa ilang balay  sa maong  higayon.

Apan  midugang  kini  nga  nasundan  pa   og  laing upat pa ka higayon  sa  pagpanglugos  kaniya. Pinaagi  usab  sa sinyas, nasayran ug nailhan  sa  mga  ginikanan  ang  tawo  nga  miamong-among  sa ilang anak.

Matud ni PO3 Floripes Mancio, imbestigador sa Women’s and Children  Protection Desk  nga nahinabi sa Banat News  nga ila pang humanon ang  apidabit  sa biktima una  nila  ipasaka  ang  kaso  batok sa suspek. BANAT NEWS