Disaster summit tambongan sa dagkong opisyal sa CV

CEBU, Philippines - Mokapin   sa usa ka gatos ka local chief executives gikan sa nagkadaiyang lungsod, syudad ug probinsya sa Central Visayas ang gitakda nga mosalmot sa Tapatan on Disaster Preparedness and Climate Change Adaptation: A Call To Action Summit sa Sugbo karong umaabot nga Mayo 25 ning tuiga nga pasiugdahan sa Department of Interior and Local Government (DILG). Matud pa ni DILG 7 Regional Director Ananias M. Villacorta nga ang maong aktibidad magsilbing tubag sa ilang ahensya sa panawagan sa nagkadaiyang sektor sa katilingban sa local nga pangagamhanan nunot sa paghugpa sa nagkadaiyang kalamidad sa nagkalainlaing dapit sa nasud.

Dugang pa ni Villacorta nga kining maong aktibidad nahilinya usab sa RA 10121 o ang Philippine Disaster Risk Reduction Management Act of 2010 ug RA 9729 o ang gitawag   nga Climate Change Adaptation Act of 2009. Ang maong summit maoy ika-duha na sa mga sunod-sunod nga dagkong tigom nga ilusad dinhi sa Central Visayas karong Mayo 25 sa Cebu International Convention Center sa syudad sa Mandaue.

Ang Tapatan on Disaster Preparedness usa ka sanga sa kalamposan sa sunod-sunod nga Tapatan nga aktibidad niadtong miaging tuig nga mipunting sa pamaagi nga nagmando sa mga LGU sa pagpahigayon og mga kalihokan nga makahatag og tukmang impormasyon alang sa katawhan.

Matud pa ni DILG Secretary Jesse M. Robredo nga ang tumong sa Tapatan Roadshow mao nga aron mapatas-an ang gikinahanglang   kaalam ug kahibawo sa katawhan kalabot sa potensyal o umaabot nga mga   peligro ug risgo sa kinabuhi.

Pinaagi niini ikapasabot usab ang tukmang panginahanglan nga himoon sa katawhan sa panahon  sa mga katalagman.

Masabtan usab sa publiko ang kamatuoran bahin sa mga hulga sa katalagman nga nagkinahanglan usab sa aktibo nilang lakang aron maluwas gikan sa mga makuyaw nga hulga sa kinaiyahan.

Dugang pa ni Robredo nga gusto niyang mapalambo ang kultura alang sa pagkaandam sa mga LGU ug sa publiko aron ang nasud makahimo sa epektibong tubag alang sa pagpakunhod sa kadaot bunga sa matag katalagman nga moigo sa nasud. Ang dakong bahin sa umaabot nga summit mao ang pagpirma sa Pledge of Commitment sa mga motambong niini alang sa ilang pagkaandam batok sa mga katalagman.

 Kini aron matino ang ilang hugot ug lig-ong sa pagtubag sa panginahanglan bahin sa mga plano nga may labot sa disaster risk reduction and management ug climate change.

 Ang DILG mopahigayon usab og sunod-sunod nga regional summit alang sa pagpausbaw sa adbokasiya alang sa pagpangandam batok sa mga katalagman ilabi na karong nahimo na ang Pilipinas nga ikatulong nasud sa kalibotan nga labing gihasi sa mga katalagman sa tuig 2011, sumala pa sa United Nations University Institute for Environment and Human Security Study. (BANAT NEWS)