CEBU, Philippines - Ilusad sa Department of Education (DepEd) 7 karong adlawa ang Brigada Eskuwela isip pagpangandam sa pagbukas sa klase sa mga tulunghaang iya sa kagamhanan karong umaabot nga unang semana sa Hunyo.
Si Regional Director Carmelita Dulangon sa DepEd 7 mibutyag nga usa ka motorkada ang motimaan sa maong kalihokan nga manukad sa dakbayan sa Naga.
Kauban sa maong motorkada ang mga principal sa eskuylanan, mga magtutudlo, mga ginikanan ug uban pa nga mopalibot sa mga dakbayan sa Talisay, Cebu, Mandaue, Lapulapu , dayon sa lungsod sa Liloan ug matapos didto sa dakbayan sa Danao.
Gipasabot ni Dulangon nga ang tinguha sa paglusad niining Brigada Eskuwela mao ang pag-atiman sa mga kuwang sa mga balay ug lawak klasehanan ug pagpangayo sa mga nadaot niini.
Kini aron nga sa pagbukas sa klase wala nay hunahunaon pa ang mga magtutudlo ug mga tinun-an kundi mao ang pagpahigayon sa normal nga klase.
Nasayud si Dulangon nga may mga edipisyo sa tulunghaan nga busloton na og atop, gubaon ang pansayan, guba ang sandayong, bungbong ug uban pa.
Gumikan niini palihukon ang mga ginikananan, mga magtutudlo, mga opisyal sa barangay aron magtinabangay nga maoy tawgong brigade ug maghiusa sa pagpangayo sa mga nadaot nga bahin sa mga eskuylahan sa ilang tagsatagsa ka lugar.
Sa miaging tuig malampuson kaayo ang Brigada Eskuwela nga gilusad dinhi sa Sugbo ug sa tanang bahin sa Central Visayas, sumala ni Dulangon.
(WC)(BANAT NEWS)