DepEd ug CHED patabango'g bantay sa presyo

CEBU, Philippines - Usa ka resolusyon nga nag-awhag sa Department of Education (DepEd) ug sa Commission on Higher Education (CHED) nga moabag usab sa programa sa Department of Trade and Industry (DTI) bahin sa price watch (Bantay Presyo) alang sa mga school supplies, giumol ni konsehal Alvin Dizon.

Matud pa ni Dizon nga dako kaayo og papel ang maong mga ahensya aron usab maabagan ang mga tinun-an sa pagpamalit og school supplies ilabi na karong nagkaduol na ang pagbukas sa klase.

Ang DTI gitakdang mobisita sa nagkadaiyang tindahan aron susihon kung mituman ba kini sa tukmang presyo sa mga supply sa eskuylahan.

Susihon usab sa maong ahensya ang tukmang kalidad sa produkto pagsuta kun pasado ba kini sa standard o sa balaod bahin sa kalidad aron sa material   aron dili magmahay ang mamalit niini.

Nagkanayon si Dizon nga gilauman niya nga ang pagsaka sa presyo sa mga school supplies sa mga tindahan niining padulong ang pagbukas   sa klase mabadlong sa mga tinugyanan sa DTI.

Bisan ang mga   negosyante nga magpatuyang og paburot sa presyo sa ilang mga baligya angay kapahamtangan og tukmang silot aron nga mapakgang sila sa pagpabug-at sa ekonomiya sa nasud.

Gipasabot sa DTI nga niining panahon sa kalisud dili angay nga ang mga negosyante labing magpaburot sa ginansya samtang ang mga kabus nga mamamalit labing mounlod sa kakabus.

Busa sa mga negosyante nga hilabihan ka hakog og ginansya, angay silang masanta sumala ni Dizon. (BANAT NEWS)