P350 mil balor sa boarding house nga naugdaw

CEBU, Philippines - Mikabat sa P350 mil ang balor sa naugdaw nga   boarding house atol sa sunog nga miigo sa barangay Poblacion, lungsod sa Barili kagahapon sa kaadlawon.

Ang maong karaang balay nga duha ka andana gipanag-iya ni Rosita Aguilar, 79, nga iyang gipaabangan sa mga kawani sa usa ka lending firm sa maong lugar.

Si FO1 Nicomedes Baisac sa pakighinabi sa Banat News kagahapon nagkanayon nga walay mga naangol sa maong sunog.

Matud ni Baisac nga sa wala pa mahitabo ang sunog usa sa boarder sa balay nga si Liezly Talapiero, 25, (lalaki) kinsa hubog kaayo giingong nanghasi kay nagkabangi og ang lain niyang kauban nga iyang kainom.

Niadtong higayona si Talapiero wala pasudla sa iyang tulo ka mga kauban sa balay busa didto kini mapuslok sa likod sa balay.

Samtang natulog si Talapiero sa mga alas 12:00 sa tungang gabii niadtong Sabado ang tulo niya ka kauban mibiya sa balay ug didto kini matulog sa lungsod sa Dumanjug tungod kay nangahadlok nga hasion sila ni Talapiero.

Apan pasado ala 1:00 sa kadlawon kagahapon kalit lang nga miulbo ang kayo sa sulod sa balay nga giingong maoy nakapukaw kang Talapiero.

Sa kahadlok, nahuwasan sa kalasbag si Talapiero ug mikabad kini og dagan dayon milayat sa koral sa pagsalbar sa iyang lawas nga dili mapaig sa kayo.

Matud ni Baisac nga sa 1:50 sa kaadlawon nadawat nila ang alarma sa sunog apan gamay nalang nga bahin sa balay ang ilang naabtan kay dali kaayo kining gilamoy sa kayo kay   ang maong balay   ginama sa mga gaan nga mga materyales.

Ang kabomberohan sa lungsod nagpahigayon pa og imbestigasyon aron pagtino sa tinuod nga hinungdan sa maong sunog. (BANAT NEWS)