Yuta sa Kawasan Falls surveyhon

CEBU, Philippines - Lima ka team sa Department of Environment and Natural Resources (DENR) 7 gitakda nga mo-survey sa sapa sa Matutinao ug Kawasan Falls sa Badian sugod karong adlawa hangtud sa Mayo 25 ning tuiga.

Ang maong survey usa sa giandam nga gimbuhaton nga may kalambigitan sa temporaryong pagsira sa Kawasan Falls nga giluwatan ni Gobernador Gwendolyn Garcia.

Ang tumong niini nga aron kahatagan og higayon ang nanag-iya og mga payag sa palibot sa busay nga makapangguba nga boluntaryo sa ilang mga tinukod nga mga estraktura sa maong lugar.

Gipaguba sa gobernador  ang maong mga payag tungod kay nakagusbat kini sa natural nga katahom sa palibot sa busay   sa Kawasan.

Ang maong mga team maglangkob sa upat ka technical personnel gikan sa Land Management Services (LMS) nga sila si Marcos Cagatcagat, Renato Padron, Publio Molde ug Emmanuel Ouano ug kauban usab sa maong grupo sila si Mardionne de los Reyes sa Protected Area and Wildlife Division (PAWD) ug Wilfredo Calledo sa Community Environment and Natural Resources Office (CENRO). Giaprobahan ni Regional Executive Director Maximo Dichoso sa DENR 7 ang Regional Special Order (RSO) number 241, series of 2012 niadtong Mayo 7 ning tuiga nga nagmugna sa maong regional team aron mopahigayon og ground verification and relocation survey sa Lot 3071 ug Public Land Survey 657-D sa Badian.

Ang maong team pangulohan ni Chamberlain Babiera sa Protected Area, Wildlife and Coastal Zone Management Services (PAWCZMS).

Adunay tulo ka ang-ang ang Kawasan Falls nga naglakip sa usa ka linaw nga gitugpahan sa tubig sa busay diin mahimong kalanguylangoyan nga luwas ug walay peligro ang kinabuhi sa mga bisita ug makahimo pa sila sa pagsakay-sakay og mga bangka sa palibot sa maong linaw.

Base sa giluwatan sa RSO, ang maong team kinahanglang makig-alayon sa   Provincial Environment and Natural Resources Office (PENRO) sa Sugbo ug CENRO sa Argao ug usab sa Provincial Government of Cebu alang sa pagpahigayon sa maong aktibidad. (BANAT NEWS)