Gidudahang kawatan gipatay

CEBU, Philippines - Pwerting lisanga sa usa ka tawo dihang motubag na unta siya sa sugo sa lawas maoy iyang nakita ang patay nga tawo nga nagbuy-od sa ilawom sa punoan sa mangga dapit sa Cebu South Coastal Road sa barangay Lawaan, dakbayan sa Talisay kagahapon sa buntag.

Si Jimmy Plando, hingkod, trabahante sa Rain View Water Refilling station   nga nagpuyo sa maong dapit naghangos nga misumbong sa kapolisan sa iyang nakita.

Sila si SPO1 Edgar Causon, SPO1 Benjamin Sebellita, PO3 Roy Lofranco, PO2 Achilles Cabando ug PO1 Edwin Campomanes maoy daling miresponde sa maong alarma.

Si Sebellita ug Causon nga nahinabi sa Banat News kagahapon nagkanayon nga nadawat nila ang report nianang alas 8:00 sa buntag.

Sa ilang imbestigasyon si Plando miadto sa maong bungtod nga wala makapatil-is tungod sa lawas patay nga iyang nakita.

Gani matud pa mikabad kini og dagan nga   nagkamamad ang tingog   nga nangayo og tabang sa iyang mga silingan. 

Ang patay’ng lawas dihang nasuta sa kapolisan nga may samad sa tuong bahin sa agtang nga sama sa gibunalan og gahi nga butang, milagom ang tuong bahin sa mata, miagas ang dugo sa baba ug dunggan.

Walay senina ang ibabaw’ng bahin sa iyang lawas apan nag-short kini og itom samtang may kabilyang bawog    nga giluklok sa hawakan sa short, may pitaka sa iyang kilid nga may hulagway sa usa ka babaye, gibana-banang 5’3-5’4 ang gitas-on sa pamarog niini, gibana-banang nagpanuigon og 20-anyos ug tabonon ang pamanit.

Ang mga polis nagkanayon nga adunay gibanig nga kolor blue nga scarf nga gimarkahan og   “collante” ang maong patay.

Duol usab sa nahimutangan sa patay’ng lawas may dakung bato nga gituohang maoy gihapak sa ulo niini.

Ang patay’ng lawas niini   nga gidala ngadto sa Saint Francis Funeral Homes sa N. Bacalso Avenue, dakbayan sa Sugbo gidudahang kawatan ug gipatay didto sa maong lugar samtang natulog tungod kay ang kapolisan wala’y nabantayan nga adunay nahitabong komusyon sa maong dapit sa wala pa patya ang maong tawo.

Matud niya nga ang mga kawatan nga manglungkabay nga ilang nasikop kaniadto mibutyag nga mogamit sila og kabilya nga bawogon ang tumoy nga maoy ilangkat sa kandado aron maabli nila ang balay o establisamento nga ilang kawatan.

(BANAT NEWS)