160 ka polis gibansay batok illegal drugs

CEBU, Philippines - Gipaubos sa Cebu Provincial Anti-Drug Abuse Commission (CPADAC) ang 160 ka mga polis sa lalawigan sa pagbansay-bansay   alang sa programa niining Just Say No sa Illegal nga Drugas. Ang duha ka adlaw nga training gituyo pagmugna sa CPADAC inabagan sa Office of the Provincial Prosecutors Office; Philippine Drug Enforcement Agency-7 ug Cebu Provincial Police Office aron ikahatag kanila ang hustong kasayoran ug kahibawo ngadto sa mga hingtungdang mga polis alang sa mas epektibong kampanya nila batok sa illegal nga drugas.

Kini ang gitug-an sa ni board member Carmen Remedios Durano Meca kinsa sa samang higayon maoy Philippine Councilors League Cebu Chapter President.

Matud pa ni Meca nga tumong niini mao ang paghatag og igong katakus sa mga kapolisan sa pagpatuman sa ilang mandato sa pagpanakop   sa mga tiggamitan og ginadiling drugas, ang pagpalig-on sa kaso aron makonbikto   ang akusado.

Samtang si Provincial Prosecutor Pepita Jane Petralba nga maoy nanguna sa maong pagbansay-bansay sa mga kapolisan aron mabantayan sa naulahi ang mga teknikalidad sa kaso   nga ipasaka batok sa madakpang akusado    ngadto sa piskaliya. (BANAT NEWS)