Lamppost sa Lapulapu ipalarot na

CEBU, Philippines - Gusto   na sa kagamhanan sa dakbayan sa Lapulapu nga malarot na ang mga lamppost nga gipanarok sa daplin sa karsada sa maong dakbayan kay naghatag kini og kahugaw sa sidewalk sa maong siyudad.

Mao kini ang mga lamppost nga gipresyohan og gikan sa P180,000 ngadto sa tag P250,000 matag usa nga gitarok   atol sa ika-12 nga ASEAN niadtong tuig 2006. 

Matud pa ni Mayor Paz Radaza   nga   iya nang gipahibalo ang buhatan sa DPWH 7 nga iya nang ipaibot ang maong mga lamppost aron mahipos kini sa maong ahensya.

Nasuta ni Radaza nga wala nay gamit   ang maong mga poste ug nahimo nalang kining sabod sa panan-aw sa kadaghanan ilabi na niadtong nasayud sa kamahal niini.

Nasayran nga ang maong mga lamppost nga gipanarok usab sa dakbayan sa Mandaue ug Cebu nakapakurat sa katawhan dihang nasayran ang kamahal niini. Ang uban nagtuo nga may sagol nga gold ang lawas sa maong mga lamppost apan dihang ilang gisusi, ordinaryo ra diay nga puthaw ang maong poste nga di gani mahalin og tag-P1,000 ang matag usa niini.

Bisan si Mayor Radaza gibati og kauwaw ning maong matang sa mga poste kansang presyo gikagubtan.

Si Mayor Radaza nga gibati og kalagot sa maong matang sa lamppost nagpaabot nga mawagtang na kini sa mga sidewalk sa Lapulapu.  (BANATNEWS)