Marcelo Fernan bridge ayuhon Hunyo 4

CEBU, Philippines - Sugdan na sa Hunyo 4, 2012 ang pag-ayo sa mga expansion joint sa Marcelo B. Fernan Bridge (MBFB) human magkauyon ang Mactan Cebu Bridge Management Board (MCBMB) nga gipangulohan ni Governor Gwendolyn Garcia sa pagtukod og usa    ka Technical Working Group (TWG) alang sa maong proyekto.

Ang tumong niini nga dili mabalda ang biyahi sa bagang duot sa mga turista nga balikbayan ug mga langyaw niining bulan sa Mayo paingon sa sulod ug paggawas sa Mactan Cebu International Airport agi sa MBFB ug sa karaang tulay. 

Sayo nini gipadali ni Gobernador Garcia ang trabaho tungod kay tingbukas sa klase ang unang semana sa Hunyo.

Atol sa milabay nga tigom sa MCDCB nga gipatawag sa gobernador nauyonan sa hunta niini nga sugdan na sa Hunyo 4, 2012 dungan sa pagbukas sa klase ang trabaho sa pag-ayo sa maong tulay ug gitakdang mahuman kini sulod sa 88 ka adlaw o tulo ka buwan.

Isentro ang trabaho niini sa pagtang-tang sa nalata na nga rubber expansion joint; pagtaod ug pagpangilis   sa steel finger type nga mga expansion joint; mobilization ug demobilization, project billboard, construction safety ug health safety sa maong tulay.

Sayo niini nasuta sa mga tinugyanan sa DPWH nga nangalata na ang 31 ka mga rubber expansion joint busa mao kini ilang ilisan sa Steel Finger Type Expansion Joint sa labing dali nga panahon.

Inigsugod og trabaho sa maong tulay mopagawas og advisory ang Philippine Information Agency (PIA) ug ang MCDCB aron masayran sa publiko ang kahinay unya sa dagan sa trapiko. (WC) (BANATNEWS)