CEBU, Philippines - Giklaro sa Philippine Atmospheric Geophysical Services Administration (PAGASA) nga normal lang ang nahitabo nga pag-uwan og ice uban sa alimpus didto sa barangay Lamac sa lungsod sa Pinamungajan sa miaging hapon.
Si Alice Canasa, weather forecaster sa PAGASA Mactan mibutyag sa Banat News nga dili katingad-an ang maong hitabo nga pag-ulan ug hailstorm kon ice didto sa Pinamungajan kasagaran man kining mahitabo basta mopasulabi ang cumulonimbus clouds kon lipak.
Hinuon gipahimangnuan sa PAGASA ang publiko nga magmatngon gyud sa panahon nga mokusog ang lipak ug dawugdog tungod kay makamugna kini og alimpus nga epekto sa inter-action niini sa yuta ug sa bagang panganod.
Matud pa ni Canasa nga dili mahitabo nga mag-uwan og ice nga mura og kumo sa tawo kay sama sa mahitabo usab didto sa America ug ubang bahin sa kalibotan nga kutob ra gyud sa mura og lugas sa mais ang gidak-on sa ice nga ulan. Gibanabana nga mikabat sa 68 ka balay ang nagusbat samtang tulo ka tawo ang naangol dihang gilambuyog sa alimpus ang balay samtang nagsakay sila niini una ilampornas sa yuta didto sa barangay Lamac, Pinamungajan. (BANATNEWS)