CEBU, Philippines - Buloy: Bitoy unsay linatin sa Akong Sala?
Bitoy: Miya Kulpa.
Buloy: Ug Akong dakong sala?
Bitoy: Miya Maxima Kulpa
Buloy: Unsaon man paglinatin sa "sala mo sala ko".
Bitoy: Kulpa yo kulpa mi(Toink!/Aguy!)
Hehehehehehehehehehehehehehehehehe!
Nahinumdom ko sa akong magtutudlo sa Pardo Gullas High School nga si anhing Henry Relatorres dihang subli kong nadungog ang pulong miya kulpa atol sa pag-atubang ni Ombudsman Conchita Carpio-Morales sa impeachment trial batok kang Chief Justice Renato Corona.
Nanumbalik ang mga pulong sa akong magtutudlo nga nahimo sab nakung suod nga higala usa ka higayon niana nga nagkanayon "ang labing lisod sa kamatooran mao ang pag-angkon sa sala".
Matud ni Sir Henry talagsaon ang kahigayonan sa usa ka binuhat pag-angkon sa sayop ilabi na kun ang nahimong kasaypanan nabilanggo sa hunahuna sa hingtungdan. Apan duna kahay kalainan ang impak sa pag-angkon kun linatin ang gamiton kay sa yanong binisaya nga pulong?
(Dihay bana nasakpan sa asawa nga nangabit)
Bitoy: Day pasayloa ko Miya Kulpa.
Senyang: Ayaw kog ilara nakasala ka na mangilad ka pa?
Bitoy: Wala ko mangilad Day tinuod nang akong pag-angkon Miya Kulpa.
Senyang: Ayaw lagi kog ilara.... Dili ko motoo anang imong Miya Kulpa.
Bitoy: Tinuod lagi na Day, miangkon naku Miya Kulpa.
Senyang: Hudiyo gyud kang dako! Sultian tika nahibaw-an na naku Miya Carpio ang tinuod nga ngalan ug dili Milya Kulpa amawa ka! (Toink!/Aguy!)
Hala paglinatin pa! Hehehehehehehehehehehehe!
(Dihay asawa nga manggihunahunaon kaayo sa bana)
Senyang: Naa kay problema Dong?
Bitoy: Day akong sayop miya kulpa.
Senyang: Ayaw ana Dong, usa na ta busa dili na imong sayop lang kun dili ato nang sayop sa linatin pa noster culpa.
Bitoy: Salamat lab ha! atong katabang atong napamabdosan. Ato gyung sayop day Noster Culpa gyud!
Senyang: Ahak!(Toink!/Aguy!)
Hehehehehehehehehehehehehehe!
Kun unsa ka sayon ang pagpamakak mao kalisod ang pagtug-an sa matuod ingon sab kalisod ang pag-angkon sa kasaypanan.
Nganong mas dali ang paglimod kay sa pagsulti sa kamatooran? Nganong mas dali ang pagpanalipod kay sa pag-angkon sa kasaypanan? Pangutana nga ang bugtong makatubag ug makapamalandong ang ato rang kaugalingon.
Busa samtang may kahigayonan ka sa pag-angkon buhata samtang taob pa ang kahigayonan sa pagpasaylo ug pag-ibot (Toink!).
Sorry miya kulpa! Pagsabot diay! (Aguy!). Estoryaheeeeeeeeeeeee!
Hehehehehehehehehehehe!
(emailad:jomar_bellita@yahoo.com)