Demolisyon sa Lapu' nagubot

CEBU, Philippines - Gibanabanang 70 ka pamilya ang nawagtangan sa ilang panimalay human mahinayon ang nagkagubot nga demolisyon diha sa sitio St. Joseph, Brgy. Marigondon dakbayan sa Lapulapu kagahapon sa buntag.

Uban sa mga sakop sa Crowd Dispersal Unit sa kapolisan ug mga sakop sa Special Weapons and Tactics, Bureau of Fire Protection ug sa MTCC Court Sheriff nga si Jasper Tajanlangit nahigayon alas 11:10 kagahapon sa udto ang maong demolisyon.

Matud pang Tajanlangit gihatagan na og higayon ang mga residente nga boluntaryong mamahawa apan nagmagahi sila pagsanong.

Dunay duha ka pre-demolition conference tali sa kapolisan, urban poor ug ang tag-iya sa maong yuta nga Philippine State Corporation ang gihimo apan walay maayong husay alang sa malinawong pagpahawa sa mga residente sa maong dapit hinungdan nga si MTCC Assisting Judge Manuel Sabillo miluwat og kamandoan aron iimplementar ang maong demolisyon.

Nanukol ang mga residente sa demolition team lakip na sa kapolisan hinuon maximum tolerance ang gipatigbabaw sa mga polis, dunay pipila usab ka residente ang gidakop sa kapolisan tungod sa pagdala og pinote ug kutsilyo.

Mibahad ang mga residente nga mokiha batok sa polis tungod sa wala pagsunod sa lagda nga modistansya apan gipasabot ni Lapulapu City Police Office Director Sr. Supt. Rey Lyndon Lawas nga nagpaduol sila gumikan sa report nga armado ang mga tawo apan wala sila moapil sa pagpangguba sa kabalayan.

Si Primo Cadampog ang CHR-7 Special Investigator nga nag-obserbar sa demolisyon kagahapon mipadayag nga walay nalapas ang mga polis.

Kahinumduman nga 32 ka mga panimalay ang demolison sa maong dapit apan ang napulo boluntaryong mihimo niini. (EIM) (BANAT NEWS)