Mipatay ni Apura ilhan na

CEBU, Philippines - Nailhan na sa kapolisan ang principal suspect sa pagpusil patay sa anak ni Mayor Necipuro Apura sa dakbayan sa Carcar, niadtong Domingo sa kaadlawon   didto sa sitio Upper Tubod sa barangay Valladolid.

Si Sr. Supt. Patrocinio Comendador, hepe sa kapolisan sa probinsya sa Sugbo kinsa mitino nga nailhan na ang mga suspetsado nga mipatay kang Carl Venson Apura, 25, ulitawo ug kamanghorang anak ni Mayor Apura, milaum nga madakpan na kini sulod ning semanaha.

Si Comendador mitataw nga kun madakpan na ang gunman ilang isunod pagdakop ang mga kauban niini apan kundili gyud nila makuha karong semanaha, ipasaka na nila ang kaso batok sa mga suspetsado   sa sunod semana.

Hinuon nagdumili gihapon pagbutyag si Comendador sa ngalan ug background sa gunman sanglit nagpadayon pa ang ilang hot pursuit operation niini. Mihangyo siya sa publiko nga mosabot kanila sanglit wala nila katulgi ang maong kaso.

Matud niya nga personal ug fraternity related gihapon ang ilang gisubay nga anggulo sa maong kaso.

Iyang giklaro nga kun nalambigit man ang ngalan sa grupo nga Tau Gama Phi Fraternity sa kaso sa biktima, kini tungod kay aduna silay gibasehan nga ebidensya.

Samtang si manlalaban Clarence Paul Oaminal, abogado sa Alpha Kappa Rho (Akrho) miingon nga dili na kinahanglang tambagan nga pakalmahon ang ilang mga sakop kay daan nang kalmado sila sa kaso ni Carl Vinson.

Niadtong Martes, ang tigpamaba sa Tau Gamma Phi Fraternity nga si Rico Osmeña sa press conference sa Rajah Park Hotel kusganong mihimakak sa pasangil nga nalambigit ang ilang sakop sa pagpusil sa biktima.

Gani gihangyo pa ni Osmeña ang Akrho nga pabiling kalma ug isalig nalang ang tanan sa kapolisan alang sa kasulbaran sa kaso sa biktima.

Apan siya midugang nga kinahanglang tan-awon usab sa pikas grupo kun aduna ba silay kapasidad sa ilang mga sakop nga mabantayan.

Hinuon siya mitataw nga sa nahitabo sa biktima ang tibuok nilang grupo nasagmuyo kaayo. 

Gihangyo ni Oaminal nga kun aduna may nahibaw-an ang pikas nga grupo, nga sakop nila maoy responsabli sa pagpusil sa biktima, ang kadagkuan niini maoy maninguha nga masulbad kining maong kaso. (WC)(FREEMAN)