DTI ug DOTC mangusog sa Helmet Act
CEBU, Philippines - Nag-alayon ang Department of Transportation and Communications (DOTC) 7 ug ang Department of Trade and Industry (DTI) 7 sa pagpatuman og mga lagda ug regulasyon mahitungod sa implementasyon sa Republic Act 10054 o Motorcycle Helmet Act of 2009 kung diin ang tanang drayber ug pasahero og motorsiklo gimanduan sa pagsul-ob sa Standard Protective Helmet samtang nagmaneho.
Matud pa ni DTI Regional Director Aster Caberte atol sa nahitabong AGIO-7 forum kagahapon nga kining maong balaod gisugdan na sa pagpatuman niadtong miaging tuig nga kadungan sa international agreement tungod kay dili lamang dinhi sa Pilipinas kini gipatuman kundi lakip na sa ubang nasud nga sakop sa United Nations.
Gipokus sa DTI ang pag-monitor sa mga establisemento nga namaligya og helmet kung mituman ba sila sa gimando sa balaod. Sa dili pa mopasar ang maong produkto, aduna pay specific mandatory standards nga pagahimuon.
Ang silot sa mga namaligya makamulta og P10,000 sa unang higayon ug P20,000 sa ikaduhang higayon ubos sa Section 5 sa RA 10054. Kinahanglan usab nga dunay Import Commodity Clearance (ICC) mark ang mga helmet.
Sa laing bahin si Land Transportation Office (LTO)-7 Raul Aguilos miingon nga sa unang semana sa Agusto ila na gyud sugdan sa pagpara ang mga drayber og motorsiklo aron susihon kung nagsul-ob sila sa standard nga helmet.
Tumong gyud niini ang kaluwasan sa mga motoristang mag-motor. Sa bag-ohay lang nga pagtuon sa LTO-7 mimenus ang nagrabehan pagkaangol sa aksidente sa motorsiklo sa Bohol nunot sa pagpatuman sa maong balaod.
Lakip sa estriktuhon unya mao ang pagpaangkas og batang nag-edad og 10 anyos paubos, duna kini multa P1,800. BANAT NEWS
- Latest
- Trending
