CEBU, Philippines - Gidemalas ang usa ka babayeng minyo human siya ug iyang kabit gipadakop sa bana human nasakpang nagdulog atol sa Mother’s Day sulod sa gipuy-an sa lalaki diha sa usa sa mga barangay sa dakbayan sa Mandaue niadtong Lunes sa kaadlawon.
Si Roden, 29, tinuod pangan gitago sa Banat News midangop sa Presinto 3 sa kapolisan sa Mandaue human niya matultuli diin matulog ang iyang kapikas nga didto diay sa balay sa lalaking giingong kababata niini.
Inubanan sa kapulisan gironda ang balay sa maong lalaki ug nasakpan ang duha nga nagdulog sa kwarto sa 30-anyos nga lalaking lumad nga taga Leyte. Si PO3 Robert Cuyos sa Presinto 3 sa Mandaue City Police Office (MCPO) sa usa ka report sa sibyaanan miingon nga usa na ka buwang nagduda sa linihokan sa ginang ang reklamante ilabi na di na kini mopauli og gabii.
Tungod niini iyaha kining gisundan niadtong Domingo atol sa Mother’s Day ug nadiskubrehan niyang didto na diay kini maglumluman sa balay sa maong lalaki. Ang duha ka mga maluibon gidakop ug gikatakdang pasakaan og kasong adultery sa reklamante. (BANAT NEWS)