Uyoan gipugakhang sa ulo patay

CEBU, Philippines - Usa ka lalaking giingong adunay nervous breakdown ang mipatay sa bana sa iyang iyaan gamit ang usa ka improvised shotgun o pugakhang diha sa sitio Kayapok-yapokan, sa Brgy. Manlabay, Dalaguete sa kaadlawon.

Ang biktima mao si Celidonio Bedolido, 68, samtang ang suspek giilang si Restituto Ricoso, 26, ug residente sa naasoy nga lugar nga sumala pa sa mga kabanay adunay sakit nga nerbiyos.

Sa imbestigasyon sa kapolisan sa Dalaguete Police Station ang asawa sa suspek nga si Mary Jane Ricoso, nangayo og tabang sa biktima ug sa asawa niini aron pakalmahon ang suspek nga misuol ang sakit ug nanghagis.

Ang biktima ug asawa niini mikuyog kang Mary Jane pagkagabii ug gipakalma ang suspek ug nakigdungan kanila og panihapon. Apan samtang sila nangatulog kalit nga misuol nianang pagkakaadlawon ang sakit sa suspek.

Matud pa kalit nga gipusil ni Ricoso gamit ang pugakhang ang ulo ni Bedolido ug wala pa gyud matagbaw gibunalbunalan ang ulo niini hangtud nga namatay. Sa kahadlok sa mga asawa sa duha nanglayat sila sa bintana ug nangayo og tabang. Nakuha sa kapolisan sa crime scene ang basiyo sa balang 12-gauge shotgun. Samtang nadakpan ang suspect atol sa hot pursuit operation sa kapolisan. (BANAT)