Frat war usa sa gisubay sa pagpatay sa anak sa mayor

CEBU, Philippines - Motukod og task Group ang Cebu Provincial Police Office (CPPO) nga langkoban sa Provincial Intelligence Branch (PIB), Provincial Investigation and Detective Management Branch (PIDMB) ug Carcar City Police Station aron maoy motutok sa imbestigasyon sa pagpusil patay sa anak sa mayor sa dakbayan sa Carcar niadtong Domingo sa kaadlawon diha sa Valladolid.

Si Sr. Supt. Patrocinio Comendador, hepe sa CPPO nagkanayon nga sa pagka karun zero pa sila sa pagpusil patay kang Carl Vinsun Apura, 25, kun may kalambigitan ba kini sa fraternity sanglit ang biktima miyembro sa Alpha Kappa Rho (Akrho).

Nagtuo si Comendador nga personal nga atraso ang pagpusil patay sa biktima. “All things are considered while the Carcar City police are still conducting an on going investigation,” sumala pa niya. “They have to enforce the local ordinance nga unta kung wa’y permit wa’y disco, at least the police will be able to secure the area,” kabahin sa pangutanang nganong walay polis nga nagbantay atol sa hitabo. Samtang si Sr. Supt. Melvin Ramon Buenafe, hepe sa Cebu City Police Office (CCPO) miingon nga andam silang makig-alayon sa CPPO kun sentro sa imbestigasyon sa kaso mao ang fraternity.

Kini human nagtuo ang kapulisan sa probinsya nga posibleng dili taga dakbayan sa Carcar ang nipusil patay sa biktima.

Sa linaing pakighinabi kang Dr. Joe Martin Fuentes, medico-legal officer sa Philippine National Police Crime Laboratory-7 kini miingon nga gidul-itan pagpusil ang biktima diha sa kilay ug ang bala miungot sa ulo.

Si Insp. Prescillano Libato, usa ka ballistician sa PNP Crime Laboratory-7 nagkanayon nga ang bala nga narekober sa ulo sa biktima, bala sa .38 revolver o kaha sa .357 revolver. (Rey B. Pasaporte/EIM)  (BANAT)