'Sex slave' sud sa 9 tuig

CEBU, Philippines - Usa ka amahan ang gidakop sa mga sakop sa mobile patrol sa Mandaue City Police Office (MCPO) human gireklamo sa 19- anyos niyang anak nga babaye tungod sa pagsige og lugos kaniya sulod sa siyam na ka tuig.

Si PO1 Earl Famador sa Presinto 1 miingon nga gikuyogan sa mga iyaan ang biktima sa pagreklamo sa ilang buhatan human mitug-an ang dalaga kanila sa gibuhat sa suspek.

Matud pa ni Famador nga atol sa pagdakop sa suspek gipasidan-an sila sa biktima nga duna kini armas nga maoy gigamit kaniya sa paghulga sa matag higayon nga lugoson siya niini dungan sa paghulgang pamatyon silang tanan kun motug-an. Ang biktima matud pang Famador gisugdan og lugos sa 10-anyos pa kini nga sagad mahitabo matag gabii nga manarbaho ang iyang inahan.

Dugang pa ni Famador nga naila usab sa ilang lugar ang suspek nga nagumon sa paggamit og ilegal nga drugas ug nadakpan na kaniadto sa paghupot og ilegal nga drugas.

Sumala pa ni Famador nga ang biktima miasoy nga dili na niini maantos ang gibuhat kaniya sa amahan ug nasamutan kini dihang gidapog siya sa miaging gabii pagkakitang duna siyay kaestoryang higalang lalaki.

Human niini misumbong ang biktima sa iyaan ug didto iyang gibutyag ang gibuhat kaniya sukad pa nga nag-edad pa siya og 10-anyos.

Wala hinuon makuha sa kapolisan ang giingong armas sa suspek apan ang asawa niini nga inahan sa biktima maoy mitahan niini ngadto kanila.

Ang Women’s Desk sa Mandaue City Police Office (MCPO) padayon na karon nga nag-andam sa kaso nga pagpanglugos ug ang ilang buhatan nag-andam na usab sa ilegal nga paghupot niini og armas. (EIM) (BANAT)