Sundalo, 2 rebelde patay sa engkwentro

DUMAGUETE CITY,Philippines  – Usa ka sakop sa Philippine Army ug duha ka gidudahang sakop sa hit squad sa New People's Army ang namatay sa engkwentro sayo sa buntag niadtong Sabado diha sa Barangay Bucalan sa Canlaon City, Negros Oriental.

Giila ang napatay nga sundalo mao si Private First Class Edmund Prieto, sakop sa 11th Infantry Battalion nga nagbase sa Guihulngan City, Negros Oriental, samtang ang duha ka mga gituohang rebelde mao sila si Argie Villasan ug Elmer Cañete.

Matud pa ni Capt. Anecito Naz sa 302nd Infantry Brigade sa Tanjay City, Negros Oriental, si Prieto maoy nangulo sa mga Civilian Armed Auxiliary napatay sa engkwentro sa sitio Natay sa maong barangay.

Ang duha ka napatay nga mga rebelde nadiskubrehan dihang gibiyaan sa ilang mga kaubang mieskapo apan usa sa mga rebelde ang naabtan ug nadakpan nga giilang si Ronnel Josalita, kinsa maoy miila sa duha ka kaubang napatay.