Migratory birds day gisaulog

CEBU, Philippines - Agig pagtamud sa kasaulogan sa World Migratory Birds Day (WMBD) ang Department of Environment and Natural Resources (DENR) 7 milusad og sunod-sunod nga kampanya uban ang mga lektura bahin sa hustong paagi sa bird watching ug uban pang  mga kalihokan sulod sa duha ka adlaw gikan niadtong Lunes   kutob kagahapon.

Uban sa tema nga Migratory Birds and People Together Through Time” ang WMBD usa ka tinuig nga gimbuhaton nga gitumong aron maproteksyonan ang mga langyaw nga mga langgam nga temporaryong mangabot nganhi sa nasud matag tuig.

Matud pa ni DENR-7 Regional Director Maximo Diochoso nga ang mga migratory birds importante kaayo kay makatabang kini sa balanse ug himsog nga sistema sa kalikopan sa nasud.

Ang gitawag nga Avian migration usa ka   proseso diin ang nagkadaiyang langgam molupad sa gatusan ug kaliboan nga kilometro sa pagpangita og labing maayo nga kondisyon sa kalikopan, uban sa abunda nga pagkaon alang sa sayon nga pagpatubo sa ilang mga kuyabog o mga anak.

Ang maong kasaulogan gipatuman niadtong 2006 ug giselebrar sugod niadtong ika-duhang   semana sa bulan sa Mayo ug gipatuman usab sa nagkadaiyang nasud sa kalibotan.

Samtang ang Olango Island Wildlife Sanctuary (OIWS) usa ka sangtuwaryo alang sa mga langyaw nga mga langgam o migratory birds ug ubang matang sa langgam, nga anaa sa isla sa Olango nga nahimutang sa lima ka kilometros sa sidlakan sa isla sa Mactan.

Base sa imbentaryo adunay 97 ka klase sa langgam sa isla sa Olango nga naglangkob sa 48 ka migratory, samtang ang 49 ka klase mga lumad sa maong isla.

Ang goberno sa Pilipinas niadtong 1992 mideklarar sa 1,020 ka ektarya nga tidal flats sa isla sa Olango isip protektadong lugar isip puloy-anan sa nagkadaiyang klase sa langgam ug marine life.   - BANAT NEWS