2 nadunggaban tungod sa tong-its

CEBU, Philippines - Duha ka managlahing insidente sa pagpanunggab sa duha ka construction workers ang nahitabo kagahapon sa managlahing lugar ug oras tungod lang sa sugal nga tong-its.

Ang unang nabiktima mao si Randy Catubay Saguin, 24, sa ka construction worker ug lumolupyo sa sitio Tabay, Brgy. Carreta, dakbayan sa Sugbo ug ang suspect nga si Ramero Tagalog residente usab sa maong lugar.  Si Saguin naghigda sa giabangang balay dihang kalit nga gisaka sa suspek ug gidunggab sa bukton. Giingong nasuko ang suspek nga gikasab-an sa biktima kay namago sa tong-its.

Sa laing insidente sa pagpanunggab, usa ka Alfonso Rabaya Tabura, 36, nga taga sitio Mahayahay Banawa, sa Brgy. Guadalupe ang naangol human dunggaba sa wala mailhing tawo nga gikaaway sa iyang igsuon. Matud pa nga naabtan sa biktima nga dunay gikaaway ang igsuon niini maong iyahang gisanta, apan mibalik ang suspek ug kalit miduslak sa tuong liog  niini. Nasuta nga nagkaaway ang igsuon sa biktima ug ang suspek tungod  gihapon sa tong-its.

“Kanang sugal wala gyud nay ayo tungod kay illegal kini, mapildi pa ta ug kung dunay tikas-tikas, lalis gamay, dayon sinukmagay, dinunggabay gubot gyud ang padulngan,” matud pa ni PO1 Esmer Escultor, sa Homicide Section nga nahinabi sa Banat News.

Kasamtangang gitambalan ang mga biktima diha sa Cebu City Medical Center samtang gipangita pa ang mga gikatahapan. BANAT NEWS