CEBU, Philippines - Usa ka wala pa mailhing tawo ang napusilan patay sa kapolisan sa syudad sa Carcar human kini giingong misuway sa pagpusil sa usa sa mga opisyal sa kapolisan diha sa maong lungsod sa miaging hapon diha sa sitio Crasher barangay Napo.
Ang biktima nga gihulagway nga nagsuot og maong nga shorts ug nag t-shirt napusilan ni Insp. Arvi Arbius, ang deputy police station commander sa Carcar City Police Station.
Sa pakighinabi sa Banat News ni Arbius, misaysay kini nga nakadawat sila og taho nga adunay armadong tawo sa maong lugar maong ilaha kining gisusi apan sa ilang pag-abot nag-iyahay og panagan ang mga tawo gikan sa usa ka payag.
Nasuta nga ang maong lugar mao diay ang tapukanan sa mga drug addict ug may mga kubol nga gituyo paghimo sa lugar aron suyopanan sa shabu.
Matud pa niini lakip sa midagan mao ang suspek kinsa dali niyang gimandoan sa paghunong ug giingong mibunot na hinuon og armas dayong tion niini ngadto kang Arbius.
Wala na paabuta ni Arbius nga mapusilan siya ug iyaha na kining giunhan ug naigo sa walang bahin sa nawong ug nalapos ang bala ngadto sa ulo. Namatay kini samtang gitabang sa Carcar City District Hospital ug wala gihapon mailhi.
Nasikop usab sa kapolisan si Proceso Geralde, 56, taga Sibonga nga usa sa nasakpan sa maong lugar. BANAT NEWS