35 ka balay demolison sa Brgy.Luz ugma

CEBU, Philippines - Magdoble ang problema sa bag-ohay lang nasunogang barangay nga mao ang Barangay Luz ning dakbayan human gimando ugmang adlawa, Mayo 15,  ang demolisyon sa 36 ka mga panimalay diha sa tulo ka mga sitio sa maong barangay base sa kamandoan ni Regional Trial Court Judge Ramon Daomilas sa Branch 11. Kahinumdoman nga niadto pang buwan sa Marso gipahibalo sa korte ang mga residente kalabot sa maong demolisyon, wala nay gihatag nga extension pa ang korte.

Ang kapitan sa Barangay Luz nga si Rian Tante mipadayag nga wala na siya’y mahimo kung mao gyud kini ang kamandoan sa korte.

Bugtong mahimo na lang sa barangay mao ang pagtabang alang sa hapsay ug malinawon  sa demolisyon kini bisan wala pay relocation site nga gihatag sa mga maapektahan.

Ang  Division for the Welfare of the Urban Poor (DWUP) gikatakda nga mohimo og tigom karong adlawa aron matabangan ang mga tawo sa maong dapit.

Una na nga gipadayag sa pangulo sa Nasudnong Katawhang Kabos (Nakabos) nga si Evangeline Abejo nga ang maong mga luna gipanag-iya sa nasudnong kagamhanan ubos sa Community Mortage Program apan nasuta nga daghan kanila ang nadelatar sa pagbayad maong gimandoan na sila sa pagpahawa. BANAT NEWS