100 ka punoang MJ gilarot

CEBU, Philippines - Mikabat sa kapin sa usa ka gatos ka punoan sa marijuana ang gilarot sa kapolisan sa usa ka plantasyon niini didto sa barangay Tabon sa lungsod sa Dalaguete niadtong Biyernes sa alas 9:30 sa gabii. Ang hepe sa Dalaguete Police Station nga si Police Insp. Dexter Basiergo maoy nangulo sa maong pagpangibot sa gidiling tanom.

Si SPO1 Veronico Centino, desk officer sa Dalaguete Police Station mibutyag sa Banat News nga samtang nagpatunhay sa kahusay ug kalinaw ang kapolisan nga gipangunahan ni Insp. Basiergo sa kalingawan alang sa piyesta sa barangay Mantalongon bukirang bahin sa Dalaguete, nakadawat sila og impormasyon bahin sa plantasyon sa marijuana sa barangay Tabon dili layo sa Mantalongon.

Si Insp. Basiergo migama dayon og team sa iyang mga sakop ug taliwala sa kagabhion mitungas sila   sa Tabon ug didto nasaksihan nila ang mga tanom nga marijuana nga pulos na hamtong nga anihunon na unta. Gisugdan dayon nila ang pagpangibot niini ug mikabat sa 100 kapin ang ilang nalarot. Wala silay nadakpang tag-iya sa maong mga tanom sanglit walay tawo sa palibot nga ilang napangutana. (BANAT NEWS)