Mihatud sa uyab nasampak sa railings patay

CEBU, Philippines - Patay nang nadangat sa tambalanan ang usa ka 16- anyos nga batang lalaki human aksidenteng nabangga sa railings daplin sa karsada ang motorsiklong iyang gimaneho sa barangay Flores lungsod sa Catmon kagahapon sa mga alas 3:00 sa kaadlawon.

Ang biktima mao si Cristian Roble,16, taga barangay Bawo sa lungsod sa Sogod ug tinun-an sa high school.

Subay sa imbestigasyon ni SPO2 Rex Menchavez, desk officer sa Catmon Police Station ang biktima gikan pa naghatud sa iyang hinigugma sa ilang pinuy-anan sa lungsod sa Catmon. Apan pag-abot sa maong lugar aksidente kining nabangga sa railings daplin sa karsada ug nalabay gikan sa iyang motor.

 Nasuta nga wala magsul-ob og helmet si Roble ug maayong pagkabunal sa ulo niini nga nakaangkon og grabeng kadaot ug bisan pa og gitabang ug gihatud sa Juan Dosado Memorial Hospital namatay gyud kini.

 Nagtuo ang kapolisan nga kusog kaayo ang pagpadagan sa biktima sa maong motorsiklo, nagduda usab ang kapolisan nga walay lisensya si Roble tungod kay menor de edad pa man kini. (BANAT NEWS)