Dul-an 300 balay ang naugdaw

 CEBU, Philippines - Migawas human sa pagsusi sa Department of Social Welfare Services (DSWS) sa dakbayan sa Sugbu nga dul-an 300 ka panimalay gyud ang naugdaw sa daw impiyernong sunog nga miigo sa barangay Luz niadtong Biyernes sa hapon.

Padayon pa ang imbestigasyon sa mga arson investigators sa maong hitabo nga swerteng walay nakalas bisan pa sa kadugayon nga napawong ang kalayo sa kabomberohan.

Si Sr. Supt. Aderson Comar ang city fire marshal sa dakbayan mibutyag sa Banat News nga ilang ipatawag karong Lunes si Ramon Villegas ang tag-iya sa balay nga gitumbok sa mga tawo diin magsugod ang sunog. Wala usab kompirmaha ni Comar kun ang impormasyong nabiyaang linung-ag o ang cellphone nga gi-charge nga unang migawas nga gidudahan maoy hinungdan sa maong sunog.

Samtang gisugyot ni Mayor Michael Rama nga mag re-blocking sa lima ka sitio nga gilamoy sa sunog diin 279 ka mga panimalay ang naugdaw ug nangadanyos.

Nagkanayon ang mayor nga mao kini ang usa sa epektibong pamaagi aron dali rang makasulod ang mga firetrucks ug uban pang klase sa mga sakyanan kung dunay mga emerhensya sama sa sunog.

Kini nagpasabot nga dili una sila makabalik pagtukod sa ilang mga balay hangtud nga dili mabutangan og hustong dalan ang maong mga sitio sama sa gibuhat sa siyudad sa barangay Carreta, Tejero, T.Padilla ug Mambaling nga naigo usab og dakong sunog sa milabay’ng tuig.

Atol sa pagkahitabo gisumpaysumpay pa sa mga bombero ang ilang mga fire hoses tungod kay 250 ka tiil ang gilay-on sa dalan padulong sa sentro sa kalayo.

Ug nagdasok usab ang tawong naghinakotay sa ilang mga gamit nga diha lang gipamutang sa dalan.

Kahinumduman nga sa unang pagbanabana sa kabomberohan niadtong Biyernes 153 lamang ka balay ang naugdaw sa sitio Santa Cruz, Santo Niño, Lubi, Abellana ug Central sagad ginama sa light materials.

Apan sa gipagawas nga talaan kagahapon sa DSWS dul-an diay kini sa 300 ka panimalay.

Nagpunsisok sa Barrio Luz Elementary School ang mga biktima sa sunog samtang ang uban niini miistar sa ilang mga kabanay ug kaila sa silingang mga lugar.

Duna karoy mga kabalakang hasta unya ang pagbukas sa klase diha sa maong tunghaan maapektahan tungod sa padayong pagpuyo sa mga nabiktima sa sunog hangtud sa kataposang bahin sa Mayo kung dili dayon mahuman ang re-reblocking.

Nasayran nga moabot ngadto sa kapin sa 2,200 ka indibidwal o 570 ka pamilya ang naapektohan sa sunog ug padayon gihapon ang pagpangita sa uban pang mga biktima sa mga tinugyanan sa DSWS.

Ang kagamhanan sa siyudad sa Sugbo mibutang og medical team sa evacuation center aron dali nga matan-aw ang nagkadaiyang sakit nga motakboy niini ilabi na sa hilanat, sip-on ug ubo. Sulod sa tulo ka adlaw ang siyudad maoy moabaga sa pagkaon, tubig ug ubang panginahanglanon sa mga biktima.

Gideklarar na usab sa mga opisyales sa maong barangay ang state of calamity aron dali ra sila makapagawas og pundo.

Usa sa mga biktima sa sunog ang emosyonal nga nahinabi sa Banat News kagahapon miingon nga dili lalim ang kalbaryong iyang giatubang karon ilabi na ang iyang mga hinagoan nahanaw sa sunog.

“Dili gyud lalim ang among kaagi, wala ko’y nasalbar nga gamit. Wala pa ko kabalo kung unsa akong buhaton kay segurado ko nga balik na pud ko sa sinugdanan. Pero ang labing importante nga wala’y dautang nahitabo nako,” matud pa ni Lina Ergerio.

Ang mga biktima sa sunog nanawagan usab sa publiko nga tabangan sila ilabi na kasagaran kanila nga wala gyud makasalbar sa ilang mga sinina.

Pipila sa mga labing gikinahanglan karon sa biktima mao ang sinina, tubig, pagkaon, unlan ug habol. (BANAT NEWS)