14 nasakit og Hepa A

CEBU, Philippines - Katorse na ka mga batan-on ang natakbuyan sa sakit nga Hepatitis A gikan sa barangay Pahina-Central ning dakbayan sukad nga namatikdan kini sa lokal nga barangay health officials sayo ning semanaha.

Si Dr. Raymund Ogan, Medical Specialist mibutyag nga 14 nalang ka molupyo sa maong barangay ang padayong gihatagan og tambal kontra Hepa-A ug duha sa unang nangatakdan ang naayo na.

Samtang si City Epidimologist, Dr. Ilya Tac-an nagkanayon nga adunay duha ka hinungdan nga matakboyan sa maong sakit kini mao ang hugaw nga tubig ug pagkaon.

Nasayran usab sa City Health nga 90 porsiyento sa molupyo sa maong lugar ang mas gipili ang pagpalit og ‘luto daan’ nga pagkaon ug usa kini karon sa gidudahang hinungdan.

Nanguha na og sample sa tubig ang mga eksperto diha sa maong barangay ug gipangsusi ang mga naninda og pagkaon ilabi na sa ilang mga tinubdan sa tubig ug kadtong namaligya og ice ug ice water.  (BANATNEWS)