LP sa 3rd District nangandam

CEBU, Philippines - Nagtigom ang mga nagkadaiyang lider sa Liberal Party sa ikatulong distrito sa Sugbu ug usa sa ilang gihingusgang makuha ang suporta mao ang dakbayan sa Toledo.

Si kanhi senador Sonny Osmeña atol sa tigom sa Liberal Party (LP) sa maong distrito diha sa Grand Convention Center kagahapon miingon nga kinahanglang makakuha sila og dakong suporta gikan sa Toledo.

Ang maong tigom gitambungan sa kanhi mayor sa Barili nga si Chuck Nemenia, incumbent mayor sa Barili nga si Mayor Teresito Mariñas ,ang mokandidato sa pagkamayor sa Aloguinsan nga si Lito Chua ug ubang mga   opisyales sa kabarangayan sa maong distrito.

“I’ll go down and run as a mayor in Toledo in order to hold Toledo,” asoy pa ni Osmeña kinsa nangangkong panahon pa ni kanhi presidente Diosdado Macapagal niadtong 1969 sakop na siya sa Liberal Party.

Samtang si Dr. June Yapha, ang district chairman sa LP sa maong distrito miingon nga mokandidato kini sa pagka board member, ang ilang grupo padayon karon sa ilang pakighimamat sa nagkadaiyang barangay sa maong distrito.  (BANATNEWS)