CEBU, Philippines - Nadakpan sa kapolisan ang giilang level 3 drug pusher atol sa buybust operation didto sa sitio Men-Ulida , barangay Calamba, dakbayan sa Sugbo sa miaging gabii.
Ang nadakpan ug nasakmitan og unom ka pakete nga gidudahang shabu mao si Victor Yanong Lumontad, 57,residente sa maong lugar.
Atol sa buybust operation nga gilusad sa City Intelligence Unit sa Cebu City Police Office, nabawian usab og KG-9 Sub-Machine gun nga may usa ka magazine si Glendover Morcilla Entice, 40, molupyo ra usab sa maong dapit.
Si Chief Insp. Romeo Santander, hepe sa CIB mitug-an nga milusad sila og buybust operation sa maong lugar gumikan sa kakusog sa negosyo nga shabu ni Lumontad.
Ila kining gipalitan og usa ka paketeng shabu pinaagi sa usa ka pusuer buyer ug dihang gitunol sa suspek ang shabu, diha-diha gisignit dayon kini sa kapolisan.
Dihang gihiling ang iyang lawas, laing lima ka pakete nga shabu ang nasakmit gikan kaniya. Matud ni Santander nga duha ka bultong shabu matag semana ang mahalin ni Lumontad sa ilang dapit ug ilang giisip kining usa ka level 3 drug pusher
Nagtingkagol na siya karon sa prisohan ug nag-atubang og kasong paglapas sa Section 5,11 ug 12 sa Republic Act (R.A) 9165 ug kasong illegal possession of firearms. (/WC) (BANATNEWS)