Liog giabis sa maguwang

CEBU, Philippines - Usa ka maguwang ang miabis sa liog patay sa iyang manghod atol gyud sa selebrasyon sa kasumaran sa adlaw’ng natawhan sa ilang inahan sa miaging gabii diha sa sitio Lintongaban sa barangay Ilaya sa lungsod sa San Fernando.

Maayong pagkaabis sa liog sa biktimang si Jovanie Malabago, 17, molupyo sa maong lugar nga maoy nakaingon sa hinanali niining kamatayon human gitigbas sa maguwang nga si Ramil, 23, usa ka mag-uuma.

Si SPO1 Francisco Salubre sa San Fernando Police station nga nahinabi sa Banat News nagkanayon nga sa wala pa mahitabo ang pagpatay miuli kini sa ilang balay ug nangayog kwarta sa ilang amahang si Gaudioso.  Apan wala dayon hatagi sa amahan hinungdan nga nanghagis ang biktima ug gibato niini ang ilang balay hangtud nga ang amahan na gyud ang gibato hangtod nga misampot sa ilang pagsinukmagay sa amahan ug anak.

Ang maguwang niadtong higayona nga nag-ihaw og manok alang sa hikay sa adlaw’ng natawhan sa ilang inahang si Gregoria, mibadlong sa iyang manghod apan inay mopatuo nasuko na hinuon kini.

Tungod sa kapungot mikuha og sanggot ang suspek ug giabis ang liog sa biktima hangtud nga nagkawilkawil nalang ang liog niini.

“Wala may record na diri (biktima) ambot kaha didto sa ilang barangay, dili pud ta kaingon ana nga tigamitan og drogas ang biktima,” sumala pa ni Salubre.

Human sa hitabo, daling miresponde ang mga tanod sa dapit ug nasikop ang suspek apan wala na marekober ang sanggot nga gigamit sa krimen.

Ang suspek gi-turnover ngadto sa buhatan sa kapulisan ug kasamtangan pang gitanggong sa detention cell sa nahisgutang lugar. (BANATNEWS)