CEBU, Philippines - Milagom ang tibuok kalawasan sa usa ka mananagat nga naigo sa lipak ug liti samtang namasol sakay sa iyang gamay nga sakayan sa kadagatan sa barangay Colon sa dakbayan sa Naga kagahapon sa alas-5 pasado sa buntag.
Si Rolando Lim, 52, molupyo sa barangay Centro Poblacion sa nahisgutang siyudad, nag-ubo na sa iyang sakayan dihang nakit-an sa laing mananagat human maigo sa kusog nga lipak ug liti. Patay na kini pag-abot sa South General Hospital.
Nakakuha na og tulo ka isda si Lim dihang kini gituohang naigo sa kilat nga miresulta sa pagkabuslot sa kasko ug napikas ang pikas kilid sa sakayan.
Si Veronica Lim, 46, asawa sa biktima nga nahinabi sa Banat News mibutyag nga alas-5 sa kaadlawon migikan ang iyang bana aron managat apan pagka-alas 6 gipahibalo nalang siyang naigo kini og kilat.
Matud pa niya nga iyaha pa kining gipugngan nga dili lang una managat tungod kay galain ang panahon ug nagpangilat apan gitubag lang siyang kinahanglan siyang mokita aron may ipuno pagpalit og tambal kaniya.
“Ako giingnan ayaw og panagat kay nagpangilat, ingon man siya ah, dag-om ra ni, tulo nako ka adlaw wala kapanagat maayo nalang kuno puno-puno niyag palit og tambal,” asoy ni Veronica.
“Pwerteng lagoma sa lawas unya nihumok iyang diri,walang dughan maoy sulti sa nakakita didto kay gidala man siya sa munisipyo,” dugang pa ni Veronica. Ang kapitan sa maong barangay nga si Annabel Uy nga nahinabi sa Banat News miingon nga ilang hatagan og financial assistance sa barangay ang pamilya niini.
Modangop usab sila ni Mayor Valdemar Chiong aron matabangan ang pamilya sa biktima.
Si Vic Montañez kauban nga mananagat sa biktima ug maoy uwahing nakaestorya sa namatay misaysay nga wala siya magtuong naigo si Lim sa kilat. “Nihapa ko, sipa lagi kaayo, wala ko kahibawo naigo diay siya sa pikas,” asoy ni Montañez kinsa dili layo namasol gikan sa gikahimutangan ni Lim. Nasuta usab nga dunay napulo ka namasol sa maong dapit nianang tungora. (EIM) (BANATNEWS)