Gigukod sa duwende naluwas

CEBU, Philippines - Usa ka  mag-uuma  nga  gituohang  gibinuangan  sa mga duwende buot  untang  maghikog pinaagi  sa pagkatkat  sa tumoy  sa kahoy nga Narra apan naluwas  kini  sa kabomberohan  kagahapon  sa buntag.

Si Rufino Angcon, 42,ulitawo lumad nga taga barangay Cantangcas sa lungsod sa Dumanjug alas 2:00 pa kagahapon sa kaadlawon mikatkat  sa maong kahoy duol sa Cebu Institute of Technology-University (CIT-U) sa dalan N.Bacalso Avenue ning dakbayan sa Sugbo kay  may  naggukod  kuno kaniyang  mga  gagmay  nga tawo  nga buot mopihaw kaniya.

Si Jobert Villacortiza, 42, security guard sa Mary Joy Village Apartment  sa maong  lugar  maoy  nakadiskitar  sa pagsaka  ni Rufino  ngadto  sa tumoy  sa Narra ug siya  maoy  misumbong  sa mga tanod.

 Nianang alas-4:00 sa kaadlawon, si PO3 Fortunato Macaranas sakop sa Punta Princesa Police station gipahibawo sa usa ka tanod kalabot sa  tawong mikatkat sa punoan  sa Narra.

Sa pagka-alas 8:24 sa buntag  misinyas na si Rufino nga magpakamatay na siya kay dili siya mokanaog kay mahadlok siya sa mga polis nga nag-atang kaniya sa ubos.

Pagka -alas 8:32 miabot ang boom truck sa Bureau of Fire Protection (BFP) nga  maoy  gisakyan ni Quirino Angcon, ig-agaw ni Rufino nga maoy  mihangyo sa naulahi  nga  manaog  nalang  sa ubos.

Dayon  sa pagka-alas 8:44 nangayo  si Rufino  og  tubig sa iyang  igsoong babaye, sa pagka-alas 8:47 miaksyon kini  og  tikang  sa basket apan  wala modayon  human  mabati  ang singgit  sa usa ka  tawo  sa ubos ug nianang  pagka-alas 9:03 hingpit  kining  misakay  sa basket  ug naluwas  siya.

Gikan  sa maong  takna  milanat  pa og  lima  ka oras  una  manaog  sa yuta  si Rufino  dihang  giam-aman  kini  sa iyang  manghud  nga  si Nila Angcon.

Si Nila mitug-an sa Banat News nga wala gyud sila makahibawo nga mianhi sa dakbayan sa Sugbo  si Rufino kay didto ra kini sa ilang lugar namuhi og hayopan ug nagdaro sa ilang umahan.

Ilang gidudahan  nga mga duwende kadtong mihamok kang Rufino nga nagpuyo sa dakong punoan sa Dita ug posibling nasuko kini nga human  purila  ni Rufino  ang  maong  kahoy  kay  gihimong  uling.

Gani gidala pa kuno sa iyang mga igsuon si Rufino sa usa ka tambalan ug matud pa, daw gibinuangan gyud sa dili ingon nato. - BANAT NEWS