Yuta sa kapitolyo higpit nga gibantayan

CEBU, Philippines - Higpit  nga  gipabantayan  sa lalawigan  sa Sugbo  ang  mga  luna  niini batok  sa mga  ilegal  nga molupyo.

Kini human aprobahi  sa Hunta Provincial  ang Resolution ni Provincial Properties Committee Chairperson,  Alex Binghay nga naghatag og katungod sa Federation of Barangay Apas Residents Associations, Inc. nga motabang sa lalawigan sa Sugbo sa pagbantay sa luna niini sa Central Command (CENTCOM) batok sa mga eskuwater.

Matud pa ni Bise  Gobernador Agnes Magpale nga   sa iyang pag-uyon sa maong   kasabotan iyang  nalantawan  nga dako kaayo kini og kaayohan nga idulot sa lalawigan sa Sugbo.

Kini  tungod  kay  di  sila gusto  nga  motumaw na  usab  ang kagubot  ug  kaguliyang batok sa kagamhanan  ug  sa mga eskuwater  ugma  damlag  sama  sa nahitabo  karon  sa mga  molupyo  sa barangay  Apas.

Gipaabot niya  nga wala na gayuy mga eskuwater nga  makapuyo sa yuta sa Centcom  sanglit aduna namay kauban ang lalawigan sa pagbantay niini. - BANAT NEWS