Sa kapistahan sa Mandaue Pagtak-op sa kadalanan nakatabang

CEBU, Philippines - Mga dalan sa kinapusoran nga bahin sa dakbayan sa Mandaue hingpit nga gitak-upan alang sa pag-agi sa mga sakyanan atol sa pagsaulog sa tinuig nga pangilin kagahapon ug gipakatap usab ang gatosang mga traffic enforcers  sa Traffic Enforcement Agency of Mandaue (Team) sugod sa sayo sa buntag hangtud na sa halawom nga kagabhion.

Nunot niini giisip nga malampuson ang maong buhatan sa ilang pagbantay sa kadalanan sanglit hingpit man nga nasinati ang kahapsay sa dagan sa mga sakyanan atol sa maong adlaw sa kapistahan.

Si Edwin Ermac nga maoy executive director sa team miingon nga nakatabang kaayo ang ilang gihimo nga pagsira sa mga dalan sa kinapusoran nga bahin sa dakbayan ilabi na duol sa simbahan sa patron nga si Senyor San Jose nga gihugopan sa daghang mga tawo.

Gitataw niya nga nahibalik ang normal nga pag-agi sa mga sakyanan sa mga dalan sa barangay Centro apan sa gihapon  ilang gipadayon ang higpit nga pagbantay sa mga dalan nga nahimutang sa kinapusorang bahin sa dakbayan.

Naglakip sa maong mga dalan mao ang P. Burgos, eskina A.C. Cortes Avenue, P, Burgos ug  eskina sa dalan Andres Soriano, dalan Gomez ug B. Ceniza, A. del Rosario ug eskina B. Ceniza, dalan Zamora  ug eskina UM Seno,  dalan S.B. Cabahug, eskina J., Plaridel, C. Ouano, ug uban pa.

Wala say natalang mga aksidente atol sa maong kalihukan. - BANAT NEWS