CEBU, Philippines - Patay ang usa ka tawong nag-atubang og kaso sa korte dihang kini misukol sa mga polis nga mosikop kaniya pinasikad sa warrant of arrest diha sa barangay Mactan, dakbayan sa Lapulapu sa miaging gabii.
Ang namatay mao si Alex Oyao, 41, taga barangay Mactan, dakbayan sa Lapulapu ug ang nakapusil kaniya mao ang grupo sa Presinto 2 sa Lapulapu City Police Office (LLCPO) nga gipangulohan sa ilang hepe nga si Chief Inspector Conrado Manatad.
Si Manatad nga nahinabi sa Banat News miingon nga dugay na nila nga gipangita si Oyao ug niadtong Lunes nakadawat sila og impormasyong naa kini sa tigbakayan sa maong dapit.
Dihang ilang giadto sa dapit nakabantay si Oyao sa mga polis hinungdan nga kini namusil sa mga polis ug mikaratel og dagan.
Hinuon walay napagang laing tawo dihang nagkatibulaag og panagan ang mga nagtigbakay.
Si Manatad miingon nga sa pagdagan ni Oyao gawas sa ruwedahan sa tigbakayan didto mitago sa panimalay ni Shella Iyas nga gitukmod pa gani sa suspetsado sa pagsulod sa maong panimalay ug gikandadohan ang pultahan.
Tungod niini ilahang gisangpit si Oyao sa pagtahan sa malinawong paagi ug tubagon ang kaso niining kalapasan sa Republic Act 9165 kon Comprehensive Dangerous Drug Act of 2000.
Matud pa ni Manatad si Oyao usa ka level 2 nga drug pusher sa dakbayan sa Lapulapu ug sa sikbit nga dapit ug nag-atubang usab kini og mga kaso nga homicide ug frustrated homicide.
Apan bisan sa ilang hangyo pabiling nagmagahi si Oyao sa paggawas hangtud nga naabtan nalang og duha ka oras maong napugos sila sa pagsulod sa gitagoan niini ug nahitabo ang sinukliay sa bala.
Si Manatad miingon nga ang mga sakop sa Emergency Rescue Unit Foundation (ERUF) maoy nagdala kang Oyao sa Mandaue City Hospital apan gideklarar kini sa mga doktor nga dead on arrival.
Nakuha sa kapolisan kang Oyao ang usa ka kalibre. 45 nga pistola nga adunay tulo ka mga kabhang ug tulo usab ka mga buhing bala ug ang pitakang dunay sulod nga P6,000.
( /EIM) (BANAT NEWS)