Police station gigranada

TACLOBAN CITY, Philippines  – Natay-og ang police station sa Can-avid , Eastern Samar niadtong Biyernes human giingong usa ka granadang gibutang sa mga nagpailang rebeldeng New Peoples Army ang miulbo sumala pa sa report sa Philippine Information Agency-8.

Si Eastern Samar Provincial Police director Manuel Cubillo miingon base sa pamahayag sa mga testigo tulo ka mga lalaking nagpailang NPA ang mibutang og granada sa maong police station nga nahimutang sa National Highway sa Barangay 4 sa maong lungsod.

Ang granada nga miulbo nakabuak sa mga bintana, nangabuslot ang kisame ug atop apan wala makaigo og polis matud pang Cubillo.

Human sa pag-ulbo dugang duha ka granada wala makabuto ang nadiskubrehan sa mga imbestigador, giingong ang usa ka oras nga brownout maoy nakaingon nga wala dayon makapahibalo ang kapolisan sa insidente.

Matud pa nga ang mga gidudahang lalaki didto midagan sa sitio Calbang apan wala na mogukod ang mga polis sa pagtuong laang kini.

Si Chief Superintendent Arnold Revilla, ang director sa Police Regional Office-8, miawhag sa mga testigos sa pag-abag sa kapolisan sa maong imbestigasyon.

Sa laing bahin,   usa ka barangay kagawad ang gipusil patay sa mga gidudahang NPA Sparrow Unit niadtong Sabado sa hapon. Giila ni Cubillo ang gipatay nga mao si Gorgonio Montiago, 42, kagawad sa Brgy. Dalid sa lungsod sa Oras, Eastern Samar. Si Montiago gipusil samtang luwan sa usa ka bus nga nagpagasolina sa diha sa lungsod sa Taft, Eastern Samar. (BANAT NEWS)