11 mil ka punoang marijuana gilarot

CEBU, Philippines - Nasikop sa mga sundawo ang usa ka mag-uuma nga maoy tag-iya sa 11,000 ka punoang marijuana nga ilang nalarot didto sa sitio Busay, barangay Patong, lungsod sa Badian sa miaging Sabado sa kaadlawon.

Ang nagtingkagol karon sa prisohan mao si Tito Omictin Jr.30, molupyo sa maong lugar kinsa nasakpan sa akto sa mga kapolisan    didto sa iyang umahan sa marijuana.

Sa pakighinabi sa Banat News ni Insp. Ervin Bellen, sa Regional Mobile Group (RMG)-7, nasuta nga human sila makadawat og report bahin sa maong plantasyon gikan sa wala magpailang tawo, miadto dayon sila sa maong lugar niadtong Biyernes sa alas 11:00 sa gabii ug naabot sila Sabado na sa kaadlawon didto sa Busay. Matud pa si Omictin nga nakalitan sa surprisang pag-abot sa kapolisan wala makaiktin pag-ikyas gikan sa posas sa mga otoridad.

Misaksi siya sa pagpanglarot sa kapolisan sa iyang mga tanom nga marijuana.

Nasayran nga ang kabukirang mga lugar sa Badian gihimo nang plantasyon sa marijuana apan ang mga opisyal sa mga barangay wala magpakabana sa pagbutyag niini ngadto sa otoridad.

Gibutyag ni Belen   nga giangkon ni Omictin nga ang iyang gipananom nga marijuana mao ang iyang mga napunitang mga liso niini.

Ang kaso nga ipasaka sa kapolisan kang Omictin mao ang kalapasan  niini sa Sec. 16 sa Republic Act 9165 kon pagpananom og ginadiling drugas. (BANAT NEWS)