10 ka balay ugdaw sa sunog

CEBU, Philippines - Nawad-an og pinuy-anan ang napulo ka pamilya sa Sacs I, barangay Buaya, dakbayan sa Lapulapu human maugdaw sa sunog sa miaging kaadlawon.

Si SPO1 Atelano Beredo, imbestigador sa Bureau of Fire Protection (BFP) sa maong dakbayan nga nahinabi sa Banat News miila sa tag-iya sa duha ka balay nga nasunog nga gipuy-an sa mga biktima nga mao sila si Marilyn Jumao-as ug Larry Sigura.

Matud pa ni SFO1 Beredo nga ang ubang mga biktima nga nagpuyo sa naugdaw nga mga balay mao sila   si Marites Garcia, Anale Arcelia, Rona Lopez, Alfredo Abarquez, Analine Pepito, Myrna Amaron Redondo, Rocel Ortis, Kenian Profero, Marita Dapan ug Marina Dejito.

Si SFO1 Beredo miingon nga ang sunog ilang nakontrolar sa paglabay sa 3 minutos ug napawong dayon kini human maugdaw ang mga balay nga ginama sa gaan nga mga dapat.

Nasuta sa mga bombero nga nagsugod ang kayo sa usa ka lawak sa balay ni Jumao-as nga giingong naggamit og lamparilya.

Gituohan nilang natumba ang maong lamparilya nga maoy hinungdan sa pagkaylap sa kayo.

Hinuon walay kinabuhing naangin sa maong sunog. (BANAT NEWS)