CEBU, Philippines - Gihangop ni 3rd District Representative Pablo John Garcia, ang pinal nga desisyon ni Vice Governor Agnes Magpale nga magpapili sa pagkabise gobernador karung umaabot 2013 election.
Matud pa ni Garcia nga haum kaayo ang desisyon ni Magpale sa nahukman sa One Cebu Party nga mitagana kaniya sa maong puwesto kun makadesider siya.
Si Kongresista PJ kinsa maoy mokandidato sa pagka-gobernador sa lalawigan sa Sugbo ubos sa One Cebu Party miingon nga ilang girespitohan ang proseso sa Bakud Party diin sa pagkakaron nahisakop si Magpale.
Gani naglaraw si PJ nga makigtagbo siya kang Magpale aron pagsuta kun sa One Cebu Party ba siya mokandidato tungod kay giandam man kaniya ang maong posisyon sa maong partido.
Sa nasayran nagpabilin pa karon nga giatangan sa mga Sugboanon kung kinsay mokandidato sa pagka-bise gobernador sa Sugbo sa One Cebu ug sa Liberal Party. - Chester Abadilla/WC (BANAT NEWS)